Paano Lutuin Ang Crispy Pata

Isa sa mga sikat na pagkaing Pinoy ang crispy pata lalo na sa mga special na handaan, kaya ito ang naisipan kong unang ibahagi sa inyo. Madali lang itong lutuin mga kababayan, pero ingat lang sa pagpipirito para di mapaso.

Mga sangkap:
1 pirasong pata (malinis na)
3 litrong tubig (dagdagan kung kailangan)
3 butil ng bawang (dinikdik)
1/2 kutsarita ng pamintang durog
1 kutsarang asin
2 litro mantika

Paraan ng Pagluluto:
1. Sa malaking caldero ilagay ang tubig, asin, paminta, bawang at pata, pakuluan hanggang sa lumambot. Kapag malambot na hanguin ang pata at patuluin.
2. Initin ang mantika sa kawali sa katamtamang apoy, kapag mainit na, ilagay ang pata at prituhin hanggang sa maluto ito. 
3. Hanguin at ihain kasama ng paborito mong sawsawan.

Tips: Para lalong lumutong ang balat wisikan ng tubig paminsan minsan habang pinipirito ito.

Pwede ring budburan ng pritong bawang kapag inihain para lalong sumarap.

Ginisang Sardinas

Kaming dalawa ni Malley (my husband) ay mahilig sa sardinas, sa kanya nilalagay sa tinapay, akin inuulam sa kanin :). Kaya I see to it na may stock ng sardinas para kung need ng madaliang paghahanda ng makakain meron kaagad magagawa. Tulad ngayon si Malley nasa London kaya nagisa na lang ako ng sardinas, tara kain tayo.
Mga Sangkap:

• 1 lata ng sardinas
• kalahating sibuyas (hiniwa)
• mantika

Paraan ng Pagluluto:

1. Lagyan ng kunting mantika ang kawali at kapag mainit na ilagay ang sibuyas gisahin ito (nasa iyo kung gusto mong medyo brown ang sibuyas o kunting gisa lang tulad ng gusto ko.)
2. Pagkatapos ay ilagay ang sardinas at gisahin ito. Karamihan sa sardinas di na kailangang timplahan dahil malasa na, pero nasa sa iyo pa rin yon kung gusto mong dagdagan ang timpla.
3. Ihain ito kasama ng kanin o tinapay. Sarap!

Ginisang Sitaw At Kalabasa

Masarap at masustansya.


Mga Sangkap:
1/2 kilo kalabasa (hiniwa)
2 tali sitaw (hiniwa)
1/4 kilo baboy (hiniwa)
1/4 tasa toyo
2 tasa tubig
3 butil bawang (dinikdik)
2 kutsara mantika
asin at paminta panimpla


Paraan ng Pagluluto:
1. Initin ang mantika at ilagay ang baboy hanggang sa maging brown saka ilagay ang bawang at gisahing maigi, ilagay ang toyo at gisahin ng ilang segundo.
2. Ilagay ang tubig at pakuluin, ilagay ang kalabasa at pakuluin ng 4 na minuto o hanggang sa malapit ng maluto at ilagay ang sitaw, lakasan ang apoy para manatiling green ang kulay ng sitaw at haluing maigi, timplahan ng asin at paminta at patayin kapag luto na ang mga gulay.
3. Ihain kasama ang kanin. Masarap magkamay 😃

Kung gusto nyong iimprove ang lasa sa pamamagitan ng paglagay ng mga powder na panimpla nasa sa inyo na po yon.

Paano Gawin ang Avocado na May Gatas

Isang classic na merienda ang avocado na may gatas, paborito ko mula noon hanggang ngayon. Palagay ko walang may ayaw nito, kung merong ayaw ito , pwede mong ibahagi dito ang iyong dahilan kabayan 😃.


Mga sangkap:

1 hinog na avocado
6 kutsara gatas na condensada
4 kutsara gatas na evaporada

Paraan ng paghahanda:

1. Hatiin ang avocado at kutsarahin ito para maalis sa balat, ilagay sa malaking bowl.
2.Ilagay ang gatas at paghuluing maigi, pwedeng kainin na agad o palamigin.

Paksiw Na Ulo Ng Isda

Ang paksiw ay isa sa mga putahe na napakadaling lutuin. May mga kaibigan ako ayaw kumain ng paksiw dahil ayaw nila ang amoy ng suka, para sa akin masarap ang paksiw at nakakagana ang amoy ng suka. Ito ang paborito kong bahagi ng isda ang ulo, dahil masarap ang mata ng isda, (nasubukan nyo na bang kumain ng mata ng isda?) kahit anong luto basta ulo ng isda gustong gusto ko, lalo na ang paksiw, kaya ito ang ibabahagi kong putahe ngayon.


Mga Sangkap:

 4 piraso ulo ng isda (kahit anong isda na gusto mo)
1 1/2 tasa  suka
2 butil ng bawang (dinikdik)
 luya kasing laki ng hinlalaki (hiniwa)
1 maliit na bell pepper pula(hiniwa)
asin at paminta na panimpla


Paraan ng Pagluluto:

1. Pagsama-samahin sa caldero ang lahat ng mga sangkap at lutuin sa katamtamang lakas ng apoy hanggang sa maluto.
2. Ihain kasama ng kanin at maghugas ng kamay dahil masarap kumain ng nakakamay 😃 sarap!

Paano Magsangag Ng Kanin Na Masarap

Araw-araw hindi maiiwasang may natitirang kanin o bahaw. Madalas kapag bahaw na ayaw ng kainin lalo na ng mga bata, pero kapag isinangag ito tiyak pag aagawan. Maraming iba't ibang sangkap ang pwedeng ilagay sa sinangag pero itong ibabahagi ko, simple lang  at common pero masarap.


Mga sangkap:

3 tasa kanin ( bahaw, pinaghiwalay na)
3 sliced ham (hiniwa ng maliliit)
1 malaking itlog (pinirito at hiniwa ng maliliit)
2 butil ng bawang (dinikdik)
1/2 tasa mais
1/2 tasa ginayat na carrots
1/2 tasa green peas
asin ayon sa iyong panlasa
mantika

Paraan ng Pagluluto:

1. Igisa ang bawang, ilagay ang ham at haluin ito sa loob ng 1 minuto, saka ilagay ang kanin, haluing madalas sa loob ng 5 minuto sa katamtamang init ng apoy.
2. Ilagay ang lahat ng mga sangkap at timplahan ng asin, haluin ito at patayin ang apoy pagkatapos ng 2 minuto.
3. Ihain kasama ng paborito mong ulam. 😀

Paano Magluto Ng Masarap Na Ginataang Sitaw

May iba't ibang paraan ng pagluto ng ginataang sitaw, pero ito ang paraan ko dahil alam ko mas masarap ito 😃


Mga Sangkap:

200 grams sitaw
100 grams hipon (malinis na)
100 grams baboy (hiniwa ng maliliit)
1 tasa purong gata
2 butil ng bawang (dinikdik)
asin ayon sa iyong panlasa

Paraan ng  pagluluto:

1.Igisa ang sibuyas, ilagay ang karne ng baboy at sangkutsahing maigi, lagyan ng asin at ilagay ang hipon, gisahing maigi.
2. Ilagay ang sitaw at haluing maigi, kapag medyo luto na ilagay ang gata at hayaang kumulo.
3. Haluin paminsan minsan hanggang sa maluto.
4. Ihain kasama ng kanin at matamis na ngiti 😃